Tre kvinner frå Stord og to unge fuglehundar stabla seg saman i bilen og rulla avgarde til Liseth, heilt vest på vidda. Der vart me innkvartert i koselege hytter. Saman med rundt 30 andre jaktglade kvinner frå heile landet, fekk me ein gjennomgang av programmet for helga av fem dyktige instruktørar frå Bergensdistriktet. Siri Torpe frå NJFF-Hordaland var kurshaldar, primus motor og instruktør. 

Laurdagen vart me delt inn i fire grupper. To av gruppene gjekk med hund og to av gruppene skulle prøva seg som støkkjegerar. Dei gruppene som skulle jakta med hund køyrde opp til Dyranut og gjekk innover derifrå. Støkkjegerane køyrde innover Isdalen og gjekk derifrå. Det vart ein lærerik dag for oss alle, sjølv om tåke og regn sette sitt preg på dagen og kanskje på fangsten. Me hadde gode instuktørar på hundefronten i Siri Torpe og Kirsten Linden. På støkkfronten var Karl Halland og Kjell Rune Haugland gode instruktørar.

Søndagen vakna me til atter ein dag med regn og tåke. Fjellet skulle likevel reinskast for fugl, så me tok med oss hagler og noko varmt i termosen og traska avgarde. Det vart ein utruleg lærerik dag med ein fantastisk instruktør, Anders Lunde, som lærte oss ferske jegarar med enno meir ferske hundar, utruleg mykje.  

Me håpar på meir vekt på sekken neste gong me kjem heim med hagla over skuldra...